ABS-CBN, umani ng 44 tropeo sa ALTA Media at 5 sa Glory Awards

 

Kinilala ng University of the Philippines (UP) College of Mass Communication at ng University of Perpetual Help System-DALTA (UPHSD) ang ilang mga programa at personalidad ng ABS-CBN para sa kanilang nagawang kontribusyon sa larangan ng media.

 

Umani ng 44 na tropeo ang Kapamilya network sa ALTA Media Icon Awards ng UPHSD na pinangunuhan ng tatlong Icon Awards para kina ABS-CBN chief content officer Charo Santos-Concio, Sharon Cuneta, at Lea Salonga para sa kanilang mga nagawa sa pelikula, telebisyon, at musika.

 

Nagwagi rin ang ilang programa ng ABS-CBN Integrated News and Current Affairs. Panalo ang “TV Patrol” bilang Best News Program, “Umagang Kay Ganda” bilang Best Morning Show, Best Documentary ang “SOCO,” Best News Talk Program ang “Tapatan ni Tunying,” Best Educational Program ang “Matanglawin,” at Best Sports Program ang “Sports U.”

 

Samantala, itinuring na Best Public Service Program Host si Julius Babao para sa “Mission Possible,” Best Morning Show Host si Amy Perez para sa “Umagang Kay Ganda,” Best Sports Program Host si Dyan Castillejo para sa “Sports U,” at Best Educational Program Host si Kim Atienza para sa “Matanglawin.”

 

Nagwagi namang Best Primetime Drama Series ang “FPJ’s Ang Probinsyano,” Best Drama Anthology ang “Maalaala Mo Kaya,” Best Daytime Drama Series ang “Ikaw Lang Iibigin,” Best Comedy Program ang “Home Sweetie Home,” Best Youth-Oriented Program ang “Wansapanataym,” Best Showbiz Oriented Talk Show ang “Magandang Buhay,” samantalang Best Public Service Program ang “Ipaglaban Mo.”

 

Samantala, lima pang Kapamilya ang pinarangalan sa Glory Awards ng UP Mass Comm, na kinikilala ang galing sa telebisyon, pelikula, pamamayahag, pananaliksik, at mga adbokasiya. Kinilala ang mga journalist na sina Ces Oreña-Drilon, Fernando Sepe Jr., at Michelle Santiago, at ang mga eksekutibo ng ABS-CBN na sina Monchet Olives at Linggit Tan-Marasigan sa kanilang kontribusyon sa telebisyon sa nakalipas na tatlong dekada.

 

Iba pa sa mga nanalo sa ALTA Media Awards ang “ASAP” bilang Best Musical Variety Show, “It’s Showtime” bilang Best Noontime Variety Show, at ang host nitong si Vice Ganda bilang Best Variety Show Host. Panalo rin ang “I Can See Your Voice” bilang Best Game Show at “Your Face Sounds Familiar Kids” (Season 3) bilang Best Talent Competition. Nagwagi rin si Robi Domingo na host ng “I Can Do That” bilang Best Talent Competition Host.

 

Best Actor for TV naman si Coco Martin (“FPJ’s Ang Probinsyano”) at Best Actress for TV si Maja Salvador (“Wildflower”). Most Influential Male and Female Personalities sina Daniel Padilla at Liza Soberano. Si Joshua Garcia ang Most Promising Male Star for TV at sila naman ni Julia Barretto ang Best Love Team. Nanalo rin si Awra Briguela bilang Best Child Performer for Film sa “Ang Panday.” Nagwagi naman si Gina Lopez bilang Best Travel Show Host (“G Diaries” sa ABS-CBN) at si Bianca Gonzales Best Lifestyle Show Host (“Modern Living TV” sa ANC), at si Alex Gonzaga bilang Most Influential Female Social Media Personality.

 

Sa kategoryang musika, panalo si Michael Pangilinan bilang Best Male Recording Artist para sa “Bakit Ba Ikaw” at si Moira Dela Torre naman ang Best Female Recording Artist para sa “Titibo-Tibo.”

 

Sa radyo naman, nagwagi bilang Best FM Radio Station ang MOR 101.9, habang ang programang “Morning Pinas” ang Best FM Radio Program. Panalo ang “Dos Por Dos” ng DZMM Radyo Patrol 630 bilang Best AM Radio Program, at ang host nitong si Anthony Taberna bilang Best AM Radio Male Personality. Si Karen Davila naman ang panalong Best AM Radio Female Personality para sa “Pasada Sais Trenta.”

 

Para sa mga update, sundan ang @abscbnpr sa Facebook, Instagram, at Twitter o pumunta sa abscbnpr.com.