Handa na para sa bagong roles at projects
Balik showbiz at balik Kapamilya si Jessy Mendiola pagkatapos ng limang taong pamamahinga. Pumirma si Jessy ng bagong kontrata sa premiere talent agency ng ABS-CBN na Star Magic noong Martes (Hulyo 2).
“I feel very special. Hindi ko in-expect na ganun kadami ‘yung nagmamahal sa akin. I wasn’t expecting na babalik ako (sa showbiz). I’m just really happy and grateful to be back home. ABS-CBN has always had my back,” pag-amin ni Jessy sa kanyang Forever Kapamilya contract signing.
Pagbabahagi niya sa kanyang pagbabalik, “Yung gusto ko pa na ma-try na ibang roles kasi before I’ve been doing sensual roles and drama. Magfo-focus ako na ma-hone ‘yung acting ko and mag-try ng gray roles, kontrabida, or mother roles."
Hangad rin niya na gusto niyang makatrabaho ang asawang si Luis Manzano, ang biyenang si Vilma Santos, Piolo Pascual, at Joshua Garcia.
Full-support din ang asawang si Luis sa pagbabalik-showbiz ng kanyang asawa.
Aniya, "Meron pa siyang passion pa rin. I think that would help her as an individual, kapag nagagawa niya ang gusto niya. If it completes who she is, makakatulong rin ito sa pagiging maybahay niya sa akin at sa pagiging mom kay Peanut. Masaya siya eh. Nagagawa niya kung ano ang nasa puso niya.”
Dumalo sa contract signing ang ABS-CBN executives na sina COO Cory Vidanes, Star Magic head at Entertainment Production head Laurenti Dyogi, at ang handler ni Jessy sa Star Magic na si Alan Real.
Sa nakalipas na 17 taon, bumida na si Jessy sa ilang hit Kapamilya series tulad ng “Sabel,” “Budoy,” “Paraiso,” “Maria Mercedes” pati na rin ang mga pelikula ng Star Cinema tulad ng “The Trial,” “The Reunion,” at “Call Center Girl.” Kinilala rin ang kanyang husay sa pag-arte sa paggawad sa kanya ng awards na German Moreno Youth Achievement Award ng FAMAS Awards noong 2012 at Best Asia Pacific Star sa 5th Asia Pacific Actors Network (APAN) Star Awards sa South Korea.
Maari naman mapanood ang buong Forever Kapamilya contract signing ni Jessy Mendiola sa YouTube page ng Star Magic.
Para sa iba pang updates, sundan ang @ABSCBNPR sa Facebook, Twitter, Instagram, TikTok, at Threads o bisitahin ang www.abs-cbn.com/newsroom.