Asahan ang mga bakbakang puno ng drama at aksyon sa pagtutuos ng apat sa pinakamahuhusay na koponan sa NCAA Season 94 Women’s Volleyball tournament sa darating na Martes (Enero 22), LIVE mula sa FilOil Flying V Centre sa San Juan City sa ABS-CBN S+A, S+A HD, LIGA, at LIGA HD.
 
Magsisimula ang Final Four sa paghaharap ng kampeon na Arellano University (AU) Lady Chiefs kontra San Beda University (SBU) Lady Red Spikers ng 2 pm, na susundan naman ng banggaan ng top seed na College of Saint Benilde (CSB) Lady Blazers laban sa nasa ika-apat na pwestong University of Perpetual Help System DALTA (UPHSD) Lady Altas ng 4 pm.
 
Papasok ng Final Four ang CSB, AU, at SBU na pare-parehong may 8-1 na kartada ngunit kinlasipika sa ranggo na 1-2-3 base sa points earned, set quotient, at point quotient, habang kinukumpleto naman ng Lady Altas ang semifinals sa pagtala ng 6 na panalo kontra 3 talo.
 
Parehong may tangang twice-to-beat advantage ang CSB Lady Blazers at AU Lady Chiefs, na nais tapusin agad ang kanilang mga kalaban sa tulong ng kani-kanilang mga star player na sina Rachel Austero at Necole Ebuen. Sa loob ng tatlong taon, nakapag-back-to-back na ang Arellano noong Season 92 at 93 habang kinoronahan naman ang CSB noong Season 91.
 
Gayunpaman, hindi papatalo ang kanilang mga makakalaban na parehong galing sa malalaking panalo. Sa pangunguna ng beteranang spiker ng San Beda na si Cesca Racraquin, nakatikim na rin ng talo ang Arellano sa kanilang laban na umabot ng limang sets 16-25, 25-17, 25-19, 18-25, 16-14  noong nakaraang Martes (Enero 15). Samantala, nasungkit ng UPHSD ang ika-apat na upuan sa Final Four nang talunin nila ang Jose Rizal Lady Bombers sa iskor na 25-13, 19-25, 25-21, 25-14, kung saan ginawa lahat ni Lady Altas spiker Cindy Imbo ang kanyang makakaya sa opensa at depensa ng itala niya ang 18 puntos, 22 digs, at siyam na receptions.
 
Mapapanood lahat ng laban sa NCAA Season 94 Women’s Volleyball Final Four sa livestream sa sports.abs-cbn.com, ang ABS-CBN Sports YouTube channel, at iwant.ph.
 
Huwag palampasin ang Final Four ng NCAA Women’s Volleyball sa S+A, S+A HD, LIGA, at LIGA HD simula ngayong Martes (Enero 22) ng 2 pm. Para sa karagdagang balita sa NCAA, sundan lamang ang @ABSCBNSports sa Facebook at Twitter at bumisita sa sports.abs-cbn.com. Para sa updates, sundan ang @ABSCBNPR sa Facebook, Twitter, at Instagram o kaya bumista sa www.abscbnpr.com.