Patuloy ang pagpapasaya ng “It’s Showtime” sa inilunsad nitong pinakabagong segment na parte ng Funanghalian na “Bata Bata Pick,” tampok ang mga host at kids ng hit noontime show noong Martes (Hulyo 30).

Sa “Bata Bata Pick,” bubunot ang host ng isang player at alay mula sa pamilya ng "It's Showtime."  Ang napiling player ay pipili ng pambato niya sa Showtime kids na magtatagisan sa mga simpleng hamon. Kung naipanalo ng napili niyang bata ang hamon ay maliligtas ang alay at may P10,000 cash prize ang ibibigay sa madlang people. Kung hindi naman pinalad ang kanyang pambatong bata ay bibigyan ng 'FUNishment' ang alay.  

Sa una nitong episode, swinerte sina Vhong Navarro at Kim Chiu matapos manalo ang kanilang pambato na si Kulot kaya naman nakapamahagi sila P10,000  sa studio audience. Ngunit hindi naman nakaligtas ang mga napiling alay na sina Vice Ganda at MC nang matalo sila sa kani-kanilang round. Ikinatuwa ng madlang people ang ipinataw na FUNishment sa dalawa nang sumayaw si Vice hanggang sa matanggal ang kanyang wig at sinuot naman ni MC ang damit ni Cianne Dominguez hanggang sa matapos ang show.

Nakakuha nga mga papuri mula sa netizens ang nasabing  bagong segment.

“Ang saya ng bagong segment na ito! Looking forward makita maglaro si Anne Curtis and Darren Espanto soon,” komento ng Facebook user na si Lau Mcrns.

“Tuwang tuwa si papa dito kanina. Salamat. Minsan ko lang kasi yun nakikitang ngumingiti,” sabi naman ng TikTok user na si Blue.

Samantala, successful din sa pagpili ang “EXpecially For You” searcher na si Althea sa tulong ng kanyang dating nobyo na si Arvie,” habang magbabalik naman si Pierce Matimat ng STI College Laguna sa preliminations ng “Tawag Ng Tanghalan” nang manalo ito laban sa contender na si Denise Fernandez ng Consolacion National High School.

Ano pa kaya ang ibang pakulo ng "It's Showtime” para sa Madlang Pipol? Panoorin sa "It's Showtime," tuwing 12:00PM sa A2Z, Kapamilya Channel, Kapamilya Online Live, GMA, GTV, Kapamilya Online Live, ABS-CBN Entertainment YouTube channel at Facebook page, at sa iWantTFC. Panoorin din ang online show nila na "Showtime Online U," sa  YouTube channel ng "It's Showtime."