Katuwang ng Knowledge Channel ang BDO Foundation at Huawei Philippines 

Mas pinasayang pag-aaral ng mga chikiting sa Math ang hatid ng Knowledge Channel Foundation, Inc. (KCFI), sa inilabas nitong bagong episodes ng “MathDali Grade 1” ni Kapamilya host Robi Domingo.  

Katuwang ang BDO Foundation at Huawei Philippines, naglabas ang Knowledge Channel ng karagdagang 10 episodes na layuning tulungang mas maintindihan ang mga aralin at konsepto sa Math ng mga mag-aaral sa Grade 1. 

Hindi naman naitago ni MathDali host Robi Domingo ang kanyang pagkatuwa sa paglawak ng programa mula sa lima nitong episodes noong 2023. Aniya, “Being part of ‘MathDali’ has been a rewarding experience and creating even more engaging content for young students this year is truly inspiring.” 

Bago ipinalabas ang bago nitong episodes, nagbigay pasilip ang Knowledge Channel sa mga mag-aaral ng Oranbo Elementary School sa Pasig City. 

Binigyang diin naman ni KCFI vice president Edric Calma ang layunin ng programang ilapit sa puso ng mga estudyante ang pag-aaral ng Math para mahasa ang kanilang critical at problem-solving skills sa pamamagitan ng kaabang-abang at interaktibong video lectures. 

Aniya, “Our goal with ‘MathDali’ has always been to make math easy, accessible, and enjoyable for our young learners.” 

Abangan ang episodes ng “MathDali Grade 1” 7am at 7pm tuwing Lunes hanggang Linggo sa Knowledge Channel na mapapanood sa free TV via BEAM channel 31, cable, direct-to-home satellite DTT, at online sa iWantTFC. Mapapanood din ito sa Knowledge Channel School Anywhere sa Kapamilya Channel and A2Z.   

Para sa iba pang updates patungkol sa KCFI at sa mga adhikain nito, bisitahin ang official website nitong www.knowledgechannel.org o i-follow ang @knowledgechannel sa Facebook, @kchonline sa X pati @knowledgechannelofficial sa TikTok. 

Para sa ibang Kapamilya updates, sundan ang @abscbnpr sa Facebook, X, Instagram, at TikTok o bisitahin ang corporate.abs-cbn.com/newsroom.