Tampok ang katapangan ni “Bhie” na yakapin ang totoong sarili 

Wagi ang student dokyu ng National University Dasmariñas, tampok ang kwento ng isang batang miyembro ng LGBTQ+ community na humarap sa pang-aabuso at kung paano niya niyakap ang kanyang tunay na pagkatao, sa “Class Project Intercollegiate Mini-Documentary Competition 2025” ng Knoweldge Channel Foundation Inc. at Philippine Assocation for Communication Educators (PACE) na eere sa Knowledge Channel simula May 3 (Sabado). 

Matapang na ikinwento ng dokyu na pinamagatang “Para Kay Bhie” ang madilim na karanasan ng isang batang inabuso noong anim na taong gulang pa lamang siya. Inilahad mismo ng biktima ang kanyang mga karanasan at takot na naramdaman bago ipaalam sa guro, magulang, at kinauukulan ang kanyang masalimuot na nakaraan. 

Pitong taon man ang inabot bago makamit ang hustisya at maipakulong ang nanghalay kay “Bhie,” proud niyang ibinahagi na natanggap niya ang pagiging bakla at mas nakilala niya ang kanyang sarili sa paglipas ng panahon. 

Samantala, pinarangalan ng ABS-CBN, Knowledge Channel, at PACE ang dalawa pang dokyu entries na pasok sa top 3 sa ginanap na “Pinoy Media Congress 2025,” taunang pagtitipon ng mahigit-kumulang 1,000 communication students at professors, sa University of Makati nitong April 24-25. 

 Bahagi ng top 3 winners ng “Class Project Intercollegiate Mini-Documentary Competition 2025” ang student docus na “Ilaw” ng La Verdad College Caloocan tungkol sa pagpupursige ng isang ina na masuportahan ang mga pangangailangan ng kanyang anak na may espesyal na pangangailangan at “Uhap” ng University of Makati tungkol sa nanganganib na maglahong lengwahe na Ayta Magbukun ng Bataan. 

Mapapanood din ang limang iba pang finalists na tampok ang iba't ibang kwento ng mga Pilipino: "Bayanihan" ng Laguna State Polytechnic University - Sta. Cruz Campus, "Bibihira" ng La Verdad Christian College of Apalit Inc., "Daluyong" ng University of Makati, "Talipâng Hakbang" ng Laguna State Polytechnic University - Sta. Cruz Campus, at "Where Feet May Fail" ng Palompon Institute of Technology. 

Ang taunang “Class Project: Intercollegiate Mini-Documentary Competition” ay bahagi ng adbokasiya ng KCFI, PACE, at ABS-CBN para suportahan ang kinabukasan ng mga susunod na media practitioners sa pamamagitan ng paglinang sa kakayahan sa paggawa ng pelikula at dokyu ng mga mag-aaral ng communications at media at maipakita sa mas malawak na manonood ang kanilang mga obra.   

Panoorin ang “Class Project Winners' Festival” tampok ang walong finalists ng “Class Project Intercollegiate Mini-Documentary Competition 2025” tuwing Sabado at Linggo, simula sa May 3 ng 6:00 pm sa Knowledge Channel at Knowledge Channel livestream sa iWantTFC! Available din ito for a limited time sa knowledgechannel.org. 

Para sa iba pang updates patungkol sa KCFI at sa mga adhikain nito, bisitahin ang official website nitong www.knowledgechannel.org o i-follow ang @knowledgechannel sa Facebook, @kchonline sa X pati @knowledgechannelofficial sa TikTok. 

Para sa ibang Kapamilya updates, sundan ang @abscbnpr sa Facebook, X, Instagram, at TikTok o bisitahin ang corporate.abs-cbn.com/newsroom.