Tampok ang mga awitin nina Marko Rudio, Reiven Umali, at Ben Mara
Mga awitin na swak para sa mga hopeless romantic na handang ibigay ang puso para sa kanilang iniibig ang handog ng Kapamilya artists na sina Marko Rudio, Reiven Umali, at Ben Mara.
Matapos hiranging kampeon ng “Tawag ng Tanghalan: All-Star Grand Resbak” season 2, inilunsad ni Marko Rudio ang bagong single na “Ulan” sa ilalim ng DNA Music. Mula sa komposisyon ng “TNT” champion at produksyon ni Gabriel Tagadtad ang rock song na umiikot sa espesyal na taong nagbibigay lakas sa gitna ng mabibigat na unos sa buhay.
Buong pusong umiibig naman ang “Tawag ng Tanghalan” season 5 winner na si Reiven Umali sa awitin na “Iba Ka Talaga.” Isinulat ni Reynald Kyle Bondoc at iprinodyus ni Kikx Salazar ang awitin na tungkol sa pangakong walang hanggan na pag-ibig para sa isang espesyal na tao. Ang bagong Star Music release ang nagsisilbing lead track ng kanyang self-titled debut extended play (EP).
Samantala, pagtanggap sa damdamin ang ibinida ng baguhang singer na si Ben Mara sa bagong awitin na “Exam.” Ikinumpara ng bagong Kapamilya singer sa isang mahirap na exam ang pag-ibig na nais niyang makamit. Mula ito sa komposisyon ni Ben habang iprinodyus naman ito ni Angelo Zipagan at inilunsad sa ilalim ng DNA Music.
Damhin ang feels ng pag-ibig mula sa mga bagong awitin nina Marko, Reiven, at Ben na napapakinggan sa iba’t ibang streaming platforms at sa ABS-CBN Star Music YouTube channel. Para sa iba pang updates, sundan ang @abscbnpr sa Facebook, X (Twitter), Instagram, at TikTok, o bisitahin ang corporate.abs-cbn.com/newsroom.
