Nananatili bilang most streamed Filipino music producer
Nagwagi ang ABS-CBN Music creatives, content, at operations head at batikang composer at producer na si Jonathan Manalo sa naganap na 2025 Awit Awards at 47th Catholic Mass Media Awards (CMMA).
Naiuwi ni Jonathan ang Best Song Written for Media sa Awit Awards para sa “Pamilya Sagrado” soundtrack na “Ulit-Ulit” na isinulat at iprinodyus niya para kay Regine Velasquez-Alcasid. Nasungkit din niya ang Best Traditional/Folk Contemporary Recording para sa iprinodyus niyang awitin na “ATM” na isinulat ni Francis Contemplacion at inawit ni Ice Seguerra.
Samantala, nakuha naman ni Jonathan ang Best Inspirational Secular Song para sa “Bahaghari” sa naganap na 47th CMMA.
“Thank you, Awit Awards, for the several wins we received! All glory and honor to my Lord & Savior Jesus Christ. Thank you also to the 47th CMMA, for recognizing Bahaghari as Best Inspirational Secular Song. It is an honor to have written/composed, produced, and interpreted this piece, (for Reverb Worship/CBN Asia) and an even greater privilege to minister through this song and share its message at the awards night,” saad niya sa isang post.
Bukod sa magkakasunod na parangal, namamayagpag din ang OPM hitmaker bilang most streamed Filipino music producer ayon sa Muso, isang music credit database. Umani si Jonathan ng mahigit 9.5 billion streams mula sa iba’t ibang music platforms at 18 billion streams sa video platforms.
Sa pagpasok ng 2026, naghahanda ang tinaguriang “Mr. Music” para sa ika-25 anibersaryo sa industriya hatid ang iba’t ibang exciting announcements at projects.
Hindi matatawaran ang naging ambag ni Jonathan sa OPM bilang creative sa likod ng hit songs tulad ng “Tara Tena,” “Gusto Ko Nang Bumitaw,” “Pagbigyang Muli,” “Patuloy Ang Pangarap,” “Pinoy Ako” at marami pang iba.
Siya ang responsable sa pagbuo ng evergreen catalogue para kina Erik Santos, Kyla, Yeng Constantino, KZ, Angeline Quinto, Jona, Ice Seguerra, Juris, Morrissette, at Moira dela Torre. Nasa likod din siya ng theme songs na inawit nina Gary Valenciano, Regine Velasquez, Sarah Geronimo, Pablo at SB19.
Prinodyus niya ang ilang hits ng BINI, Lagi,” “Strings,” “Blooming,” at “Paru-paro.” Siya rin ang producer sa likod ng mga awiting narinig sa iba’t ibang pelikula at teleserye ng ABS-CBN, kabilang na ang “It’s Okay To Not Be Okay” soundtrack album, “Pinoy Big Brother Celebrity Collab Edition” songs, at “Dilaw” ni Maki para sa “My Love Will Make You Disappear.”
Naisabuhay ang ilan sa classic hits ni Jonathan sa musical na “Delia D: A Musical Featuring the Songs of Jonathan Manalo,” na ipinalabas sa Newport Performing Arts Theater mula Abril hanggang Hunyo 2025 at nakasungkit ng multiple nomination sa upcoming Aliw Awards.
