Muling pumirma ng kontrata ang Kapamilya R&B balladeer na si Jason Dy sa Star Music sa pagdiriwang niya ng ika-10 taon sa industriya, at kabilang sa selebrasyon niya ngayong taon ang paglulunsad ng bagong album at pagkakaroon ng solo concert.
“Maraming salamat, Star Music, for this renewal of trust. I’m so excited to create more music with you guys. I’m very excited for everything that we’re releasing this year and for years to come,” sabi ng “The Voice of the Philippines” season 2 grand winner sa ginanap na contract signing ceremony sa ABS-CBN Dolphy Theater.
Nakatakda niyang pangunahan ang 10th anniversary concert na “SoliDYfied: A Decade of Jason Dy” sa Hunyo 27 (Biyernes), ang petsa kung kailan nakatakda ring ilunsad ang bago niyang album.
Hindi lang musika kundi fashion ni Jason ang itatampok sa “SoliDYfied” na mapapanood sa Newport Performing Arts Theater at pangungunahan ni John Prats bilang direktor.
“I already reached out to designers that I wanna work with and binato ko na sa kanila yung ideas ko, the clothes have to match the songs I’m performing. Expect something shiny, sparkly, kakaiba!,” kwento ni Jason.
Kasama ang kanyang mga kaibigan na sina KZ Tandingan at Yeng Constantino bilang special guests sa show na magsisilbi ring co-producers nito kasama ang Cornerstone Concerts.
Samantala, ang anniversary album niya ay magtatampok ng mga hindi malilimutang awitin mula sa 10-taon journey ni Jason, ayon kay ABS-CBN Music creatives, content, and operations head Jonathan Manalo.
“Naka-plan agad ang new anniversary album ni Jason na magiging celebration ng 10 years niya. All the songs that you’ve loved hearing Jason sing in the last 10 years you will hear in this upcoming album,” sabi ni Jonathan sa contract signing event.
Nakiisa rin sa okasyon ang Star Music label head na si Andie Arellano at Cornerstone Entertainment vice president na si Jeffrey Vadillo.
Tinaguriang Prince of Soul ng bansa si Jason na napapanood sa “ASAP” at naging interpreter na rin sa Himig Handog at Philpop songwriting festivals. Ilan sa mga huli niyang inilabas na kanta ang “Ulit-Ulit” at ”Magsabi Ka Lang.”
Panoorin ang “SoliDYfied” concert at abangan ang upcoming album ni Jason sa iba’t ibang music streaming platforms. Para sa karagdagang detalye, sundan ang Star Music PH sa
Facebook,
X (Twtter),
Instagram,
TikTok, at
YouTube.
Para sa iba pang updates, sundan @abscbnpr sa
Facebook,
X (Twitter),
Instagram, at
TikTok, o bisitahin ang
corporate.abs-cbn.com/newsroom.