“Hindi ko in-expect,” ani Kathryn
Nayanig ang social media matapos ang sorpresang anunsyo ng tambalan nina Kathryn Bernardo at James Reid para sa isang ABS-CBN teleserye kung saan nagtala ang video teaser ng higit 3.5 milyong views sa loob ng 24 oras.
Natuwa ang fans sa pangmalakasang tambalan ng Asia’s Superstar at ng Multimedia Prince para sa kauna-unahan nilang teleseryeng pagbibidahan nila na magkasama, at aminado rin si Kathryn na hindi rin niya inasahan na makakapareha niya si James.
“Hindi ko in-expect. Baka si James din hindi niya in-expect. Sinong mag-aakala na pagkatapos ng ilang taon, at galing pa kami ng kanya-kanyang love team, na magkakasama kami para sa comeback teleserye namin? Posible na talaga ngayon. Excited na kami,” sabi ng aktres sa panayam ng “TV Patrol.”
Nagpatikim din si Kathryn sa mga dapat abangan mula sa teleserye nila at sinabing, “Nakakapanibago ito. Ang ganda-ganda ng konsepto ng series na ito. Sa lahat ng kwentong ipinakita, ito talaga ang gusto kong gawin kasi hindi lang ito tungkol sa pag-ibig. Tungkol din ito sa pagkakaibigan, pamilya, at mga babae.”
Inanunsyo ng ABS-CBN at Dreamscape Entertainment ang tambalan nina Kathryn at James kahapon (Agosto 29) sa pamamagitan ng isang video teaser kung saan makikita ang nakakakilig na chemistry ng dalawa habang kinukunan sila ng mga litrato para sa look test ng serye.
Abangan ang iba pang detalye tungkol sa serye at kung sino-sino pang artista ang makakasamsa nina Kathryn at James.
Ito ang nagsisilbing comeback teleserye nilang dalawa pagkatapos ng “2 Good 2 Be True” ni Kathryn noong 2022, at “Till I Met You” ni James noong 2016.
Para sa updates sundan ang @abscbnpr sa Facebook, Twitter, Instagram, at TikTok, o bisitahin ang corporate.abs-cbn.com/newsroom.