Mga awitin para sa pangungulila at pag-asang magmahal muli
Binigyan ng bagong kulay ng “Idol Philippines” season 2 alum na si Misha De Leon ang mga awitin mula sa Himig Handog sa kanyang debut extended play (EP) na “Between Sighs.”
“I’m truly overwhelmed and thankful for the support people have shown for my music. I’m so grateful for the entire StarPop team for the love, time, and energy they poured into helping me in this EP,” saad niya.
Tampok sa EP ang anim na bagong rendition ni Misha ng mga kantang “True Love” ni Mike & Noah, “Sugarol” ni John Sabili, “Wow Na Feelings” ni Karlo Zabala, “Sa’yong Mundo” ni Joan Da at LJ Manzano, “Out” ni Erica Sabalboro, at “Nyebe” ni Aries Sales. Pinangunahan ni StarPop label head Roque “Rox” Santos ang produksyon nito.
Samantala, nakasama naman ang key track na “Sa’yong Mundo” sa Spotify New Music Friday Philippines at Fresh Finds Philippines playlists.
Nakilala si Misha nang maging bahagi siya ng “The Voice Kids Philippines” season 3, kung saan naging coach niya si Sharon Cuneta. Sumali rin siya sa “Idol Philippines” season 2 at pinahanga ang mga manonood sa performance niya ng “Oo” at “Sign of the Times.”
Inilunsad ng StarPop artist ang unang single niya na “Damdamin” noong 2023 na umani ng mahigit 200,000 streams sa Spotify. Sinundan niya ito ng iba’t ibang awitin tulad ng “Haging” at “Equilibrium.”
Bukod dito, inawit din niya ang ilang theme songs para sa pelikula at teleserye tulad ng “Dito Ba” mula sa “A Very Good Girl” at “Gising Gising” mula sa “It’s Okay To Not Be Okay.”
Available ang “Between Sighs” EP ni Misha sa iba’t ibang digital streaming platforms. Para sa ibang detalye, sundan ang StarPop sa Facebook, X (Twitter), Instagram, at TikTok.
Para sa iba pang updates, sundan ang @abscbnpr sa Facebook, X (Twitter), Instagram, at TikTok o bisitahin ang corporate.abs-cbn.com/newsroom.
