Ibibida ang OPM sa Singapore, Indonesia, North America, at Australia
Dadalhin ni Maki ang makulay na mundo ng “KOLORCOASTER” at patuloy na ibibida ang OPM sa kanyang kauna-unahang solo world tour na bibisita sa Singapore, Indonesia, North America, Australia, at New Zealand ngayong taon.
Inanunsyo ni Maki ang world tour sa naganap “KOLORCOASTER: One More Ride” concert sa Araneta Coliseum noong Pebrero 21 kung saan ibinahagi niya ang excitement na makapag-perform sa iba’t ibang bansa.
“I want to give the same energy here or even better sa iba’t ibang bansa kasi I’m not only representing myself, but also OPM. Nagulat na lang ako no’ng nakita ko yung poster tapos naisip ko, ‘Grabe pupuntahan ko lahat ito?’ When we see things like these happen in OPM, I feel really proud,” saad ng “Dilaw” hitmaker.
Handog ng Tarsier Records, ABS-CBN Music, ABS-CBN Global, at in partnership with Flabbergast Productions, ang “KOLORCOASTER” Asian tour na bibisita sa The Theater at MediaCorp sa Singapore sa Hunyo 13 at sa Bengkel Space sa Indonesia sa Hunyo 14. Magiging available ang tickets at iba pang detalye nito sa MakiKolorcoasterTour.myx.global.
Magbibigay-kulay rin ang kanyang “KOLORCOASTER” concert sa North America, Australia, at New Zealand na malapit nang ianunsyo ang mga petsa kung kailan ito magaganap.
Sinimulan ni Maki noong Nobyembre ang “KOLORCOASTER” concert sa The Big Dome. Sinundan ito ng “KOLORCOASTER Middle East Tour” sa United Arab Emirates at Qatar kasama ang special guest na si Yeng Constantino.
Bisitahin ang MakiKolorcoasterTour.myx.global para sa tickets at iba pang detalye ng Asian leg ng “KOLORCOASTER.” Para sa ibang updates, sundan ang Tarsier Records sa Facebook, X (Twitter), Instagram, TikTok, at YouTube.
