Proseso ng pagbuo ng banda, tampok sa docu-reality series sa YouTube
Opisyal nang ipinakilala ng ABS-CBN Music ang kauna-unahan nilang OPM band na The Red Strings, na nabuo sa docu-reality show nito sa YouTube na “The Next Big Band.”
Nagkaroon ng launch party para ipakilala ang anim na miyembro ng grupo at dito rin ginanap ang kanilang contract signing sa ilalim ng alternative-rock record label ng ABS-CBN na DNA Music.
“It has always been the mission of the company to discover new artists to develop and help them reach their fullest potential. I know these kids will be the voice of their generation,” mensahe ni Jonathan Manalo, head of creatives, content, and operations ng ABS-CBN Music.
Binubuo ng The Red Strings nina Gello Marquez (vocalist), Cedryck Guda (drums), Llana Catudio (keyboard), Nicholas De Rosales (bass guitar), Mychole Liam Barba (electric guitar), at Risen Santos (acoustic guitar).
Tumugtog din ang banda sa launch party ng tatlong orihinal nilang mga kanta na sila mismo ang sumulat. Nagpakilig sila sa kanilang debut single na “Asado,” na tungkol sa pagiging ‘delulu’ o nahihibang sa maling akala, at “Nasa Ulap” at “Kupido,” mga kantang nakakaindak at nakaka-inlove.
Dumalo rin sa contract signing ng The Red Strings sina ABS-CBN Music head Roxy Liquigan at DNA Music head Gab Tagadtad.
Nabuo ang The Red Strings sa “The Next Big Band,” isang original YouTube docu-reality series ng ABS-CBN kung saan ipinakita ang proseso ng paghanap at pagbuo ng banda mula sa mga nangangarap na musikero.
Napapanood na ang lahat ng episodes ng docu-reality series sa ABS-CBN Entertainment YouTube, ang most-subscribed media at entertainment channel sa Southeast Asia na may 54.7 million subscribers.
Para sa iba pang updates sundan ang @abscbnpr sa Facebook, Twitter, Instagram, at TikTok, o bisitahin ang corporate.abs-cbn.com/newsroom.
