Nominado sina Angelica Panganiban at “The Silent Noise” ng ABS-CBN na napapanood sa Prime Video sa Global OTT Awards 2026 na gaganapin sa Hunyo 20 (Sabado) sa Busan Cinema Center sa South Korea.
Kabilang si Angelica sa mga nominado sa Best Lead Actor (Female) category dahil sa kaniyang pagganap sa “The Silent Noise,” habang nominado rin ang serye sa Best Asian Contents category.
Kinikilala ng Global OTT Awards ang mga platform, creators, at content na nangunguna sa streaming media sa larangan ng drama, variety, at music sa pamamagitan ng 14 competitive categories at limang invitational categories.
Sa direksyon ni Onat Diaz, tampok sa serye ang ikalimang pagtatambal nina Angelica at Zanjoe kasama sina Zaijian Jaranilla, Mutya Orquia, at bagong child star na si KD Omalin. Kabilang din sa cast sina Mylene Dizon, Joem Bascon, Karina Bautista, Tommy Alejandrino, Ramon Christopher Gutierrez, Junjun Quintana, Joel Saracho, at Kakki Teodoro.
Nakakuha ng solid viewership ang 10-episode mystery-thriller limited series na “The Silent Noise” at naging isa sa mga pinakapinanood na serye sa Prime Video Philippines matapos ang premiere nito noong March.
Napapanood ang “The Silent Noise” ng ABS-CBN sa Prime Video at available rin ito sa mahigit 240 countries at territories worldwide, eksklusibo sa Prime Video.
Para sa iba pang balita, sundan ang @ABSCBNPR sa social media o bisitahin ang corporate.abs-cbn.com/newsroom.
