Excited sa bagong yugto ng Asian music sa Grammys
Malaki ang pasasalamat ng Filipino songwriter-producer at Recording Academy voting member na si Jonathan Manalo sa mga tagapakinig ng musika sa pagkamit niya ng mahigit 10 bilyong all-time streams.
Aniya, “It’s a number I’m deeply grateful for, but more than a milestone, it’s a reminder of the incredible journey that music can take. Every stream represents a listener who connected with a song, a story, a melody, or a moment that meant something to them.”
Umabot na sa 10.2 billion streams ang pinagsamang musika niya sa iba’t ibang digital platforms, kabilang ang Apple Music, Spotify, at YouTube, base sa datos ng Muso AI nitong Hunyo 25 na isang natatanging milestone bitbit ang mga na naging bahagi na ng iba’t ibang henerasyon.
Kabilang dito ang timeless songs na isinulat at iprinodyus ni Jonathan para sa mga natatanging OPM artist mula kay Gary Valenciano, Lea Salonga, Martin Nievera, Regine Velasquez-Alcasid, at Lani Misalucha hanggang kay Sarah Geronimo, Kyla, Erik Santos, Ebe Dancel, Yeng Constantino, Angeline Quinto, Jona, Moira Dela Torre, SB19, BINI, BGYO, at marami pang iba.
Patunay ang streaming milestone na ito sa walang kupas na hatak ng mga orihinal na soundtrack ng mga minahal na pelikula, teleserye, at digital series—mga awiting nagiging bahagi ng alaala ng mga manonood habang naaabot ang mga bagong tagapakinig.
Kasabay ng milestone na ito, ibinahagi ni Jonathan ang excitement niya para sa pagpasok ng Best Asian Pop Music Performance na pagkilala sa GRAMMY Awards.
“Asia is home to some of the world’s most vibrant music cultures, and this recognition reflects the growing impact of Asian artists, songwriters, producers, and creatives as active participants in the global music community,” sabi niya.
Naniniwala rin siya na isa itong hakbang na magbibigay ng inspirasyon sa mga Pinoy at magbubukas ng mas marami pang oportunidad sa international stage.
“For Filipino artists especially, this is an encouraging step forward. Filipino music has always been rich in talent, storytelling, and artistry. As we continue to engage with and contribute to the global music landscape, opportunities like this help shine a brighter spotlight on the music excellence coming from the Philippines and across Asia,” dagdag ng multi-awarded musician.
Si Jonathan ang sumulat at nagprodyus ng mga minahal na awitin tulad ng “Tara Tena,” “Gusto Ko Nang Bumitaw,” “Pagbigyang Muli,” “Patuloy Ang Pangarap,” at “Pinoy Ako.” Malaki ang naging ambag niya sa timeless catalog ng maraming OPM artist tulad nina Angeline Quinto, Erik Santos, Kyla, Ice Seguerra, Morissette, Moira Dela Torre, at iba pa.
